وہی داغِ لالہ کی بات ہے کہ بہ نامِ حسن ادھر گئی......! Urdu Poetry-ARK .18

.....وہی داغِ لالہ کی بات ہے کہ بہ نامِ حسن ادھر گئی
......کوئی کیا کہے کہ کہاں کہاں ترے خالِ رخ کی خبر گئی
 

 

.....کوئی ہاتھ دشنۂ جاں ستاں کوئی ہاتھ مرہمِ پرنیاں

.....یہ تو ہاتھ ہاتھ کی بات ہے کوئی وقت پا کے سنور گئی

 

.....وہی ایک سود و زیاں کا غم جو مزاجِ عشق سے دور تھا

.......وہ تری زباں پہ بھی آ گیا تو لگن ہی جی کی بکھر گئی

 

......کسی ایک سلسلۂ وفا کی متاعِ زلفِ دوتا نہیں

......کوئی پیچ و تاب ہوا ملے کہ وہ زلف تا بہ کمر گئی 

 

......یہ شکایت در و بام کیا یہ رباطِ کہنہ کی رات کیا

......کوئی بے چراغ شبِ وفا ترے شہر میں بھی گزر گئی

 

......اسی زندگی کے ہزار افق اسی زندگی کے ہزار رخ

.....اسی اک خیال کی رو تھی وہ جو تری جبیں پہ بکھر گئی 

 

.....وہ ہزار شوق کی لغزشیں مگر ایک لذتِ ناز سی

.....مری آشنائے طرب نظر ترے رخ پہ آ کے ٹھہر گئی

 

.....کبھی آتشِ خس و خار سے بھی گلوں کو ذوقِ نمو ملا

..... کبھی شاخِ گل سے لہک اٹھی وہ سناں جو تا بہ جگر گئی

 

.....وہ زبانِ سرمدِ بے دلیل وہ خراشِ خنجر حکمراں

......کوئی امتحانِ دلیل کیا کہ دلوں میں بات اتر گئی 

 

.....وہ غریب شہر کہے بھی کیا جو تری زباں سے ہے بے خبر

......مگر ایک راہ سخن بھی ہے کہ یہ زندگی ہے جدھر گئی